اک سنتِ خدا ہے صل علیٰ محمدؐ
قرآن کہہ رہا ہے صل علیٰ محمدؐ

مدحت کی ابتدا ہے صل علیٰ محمدؐ
رحمت کی انتہا ہے صل علیٰ محمدؐ

یہ حکم کبریا ہے صل علیٰ محمدؐ
محبوب کی ثنا ہے صل علیٰ محمدؐ

تمجید مصطفیٰ ہے صل علیٰ محمدؐ
مدحِ شہِ ھدیٰ ہے صل علیٰ محمدؐ

بیمار کی دعا ہے صل علیٰ محمدؐ
آزار کی دوا ہے صل علیٰ محمدؐ

دس رحمتوں کی بارش ایک بار کاصلہ ہے
یہ بخششِ خدا ہے صل علیٰ محمدؐ

کرتے ہیں ورد اِس کا اللہ کے فرشتے
حوروں کا مشغلہ ہے صل علیٰ محمدؐ

جب ہو کوئی مصیبت آجائے کوئی آفت
پڑھ، ردِّ ہر بلا ہے صل علیٰ محمدؐ

ہر حرف زود اثر ہے ہر لفظ پُر ثمر ہے
فی الجملہ کیمیا ہے صل علیٰ محمدؐ

پڑھ لیں گے جس دعا کے ہم اول آخر اس کو
مقبول وہ دعا ہے صل علیٰ محمدؐ

ناوکؔ پئے شفاعت امیدوارِ رحمت
یا شاہِ انبیاء ہے صل علیٰ محمدؐ

ناوکؔ حمزہ پوری

Dar-ul-Adab
Hamza pur , Sherghati
Gaya (Bihar)
Mob: 9973046607
بشکریہ ’’صل علیٰ محمد‘‘ 	مرتب: مشتاق دربھنگوی
……………………………