غزل

سوئے کعبہ کوئی کوئی سوئے بت خانہ چلا
تیری جانب در حقیقت تیرا دیوانہ چلا
شیخ مسجد سے کہا مست مئے عرفاں نے یہ
تم یہیں بیٹھے رہو میں سوئے میخانہ چلا
عشق میں کام آکے پائی یوں حیات جاوداں
جب نہ میں باقی رہا تو میرا افسانہ چلا
جان اپنی لے کے بھاگی دوسری جانب مگس
شمع کی جانب چلا تو صرف پروانہ چلا
گرد ہوکے اڑگئے فوراً خیالات دوئی
میکدے میںجب مئے وحد ت کا پیمانہ چلا 
جتنے پردے تھے وہ سب تھے دوسروں کے واسطے
جانب عشاق خود وہ بے حجابانہ چلا
برقؔ نااہلوں کی صحبت میں نہ بیٹھے ہم کبھی
مل گئے ہم جنس توجی بھر کے یارانہ چلا
+++