|
* زمانے بھر میں جو پھیلی ہوئی معلوم *
نعت
زمانے بھر میں جو پھیلی ہوئی معلوم ہوتی ہے
عرب کے چاند کی وہ چاندنی معلوم ہوتی ہے
مئے وحدت جو دنیا بھر میں تو نے بانٹ دی ساقی
مجھے اس سے تری دریا دلی معلوم ہوتی ہے
چمکتا ہے ترے روضہ کے گنبد کا کلس ہر دم
چمک بجلی کی تو آئی گئی معلوم ہوتی ہے
خدا کا گھر سہی کعبہ مگر مولا ترے آگے
مجھے محراب کعبہ بھی جھکی معلوم ہوتی ہے
کرشمہ ہے یہ تیری بزمِ اقدس کے تصور کا
کہ تنہائی میں بھی محفل سجی معلوم ہوتی ہے
سبق لیتے رہیں گے اہل ایماں حشر تک جس سے
وہ تیری داستان زندگی معلوم ہوتی ہے
شہنشاہان دنیا برقؔ جھکتے ہیں یہاں آکر
مدینے کی حکومت مر کزی معلوم ہوتی ہے
+++
سلام بحضور
سیدالمرسلین وعلیٰ آلہ واصحابہ واولیائے اُمتہ اجمعین
دین ودنیا کے سرور پہ لاکھوں سلام
کملی والے پیمبرؐ پہ لاکھوں سلام
شمعِ بزم ہدیٰ سید الانبیاؐ
شافعِ روزِ محشر پہ لاکھوں سلام
مرکزِ چشم امید تشنہ لباں
ساقی حوضِ کوثر پہ لاکھوں سلام
جس کی زلفوں کی کھائی خدا نے قسم
اس کی زلفِ معنبر پہ لاکھوں سلام
جس کے صدقے میں ایماں کی دولت ملی
اس پہ اور اس کے گھر بھر پہ لاکھوں سلام
جس کا سایہ تھا گم کثرتِ نور میں
اس کے جسم منور پہ لاکھوں سلام
جس کی تصدیق کی سنگریزوں نے بھی
ایسی محبوبِ داور پہ لاکھوں سلام
شمعِ غار حرا مہر اوج صفا
زیب محراب ومنبر پہ لاکھوں سلام
جس کو اے برقؔ معراج حاصل ہوئی
اس کے اوجِ مقدر پہ لاکھوں سلام
ثانی الاثنیں فی الغار جس کی صفت
ایسے صدیق اکبر پہ لاکھوں سلام
بڑھ گئی جس کی شوکت سے تمکین دیں
اس عمرؓ عدل گستر پہ لاکھوں سلام
جس کی دولت سے دیں کو ملی تقویت
اس غنی ؓ مخیر پہ لاکھوں سلام
جمع قرآں کا حاصل ہے جس کو شرف
اس کی سعی مکر ر پہ لاکھوں سلام
ناز پروردۂ احمد مجتبیٰ ؐ حیدرِ شیرؓ صفدر پہ لاکھوں سلام
غازئ سر بکف شہر یارنجف
فاتح جنگ خیبر پہ لاکھوں سلام
جس نے تنہا ہزاروں کو پسپا کیا
اس جری اس دلاور پہ لاکھوں سلام
واقف راز ہائے خفی وجلی
باب علم پیمبر پہ لاکھوں سلام
پیاری خاتونِ جنت پہ صدہا درود
پیارے شبیر وشبر پہ لاکھوں سلام
چیر کر جس کا ہندہ جگر کھاگئی
اس شہیدوں کے افسر پہ لاکھوں سلام
پرتو ذوالمنن خالدؓ صف شکن
دین کے میر عسکر پہ لاکھوں سلام
طلحۃؓ الخیر کا جس نے پایا لقب
اس فدا ئے پیمبر پہ لاکھوں سلام
قلب و جانم فدا بر بلالِ ؓ نبیؐ
روح سلمان ؓ وبوذرؓ پہ لاکھوں سلام
جو کہ بدر و احد صف آرا ہوا
اس وفا کیش لشکر پہ لاکھوں سلام
جیتے جی جن کو جنت کا مثردہ ملا
ان فدایان سرور پہ لاکھوں سلام
جملہ اصحابِ ؓ سرور پہ لاکھوں درود
جملہ زوجاتِ ؓ سرور پہ لاکھوں سلام
سائیہ فضل رب غوث اعظم ؒ لقب
محی دین پیمبرؐ پہ لاکھوں سلام
قبر گنج شکرؒ پر عقیدت کے پھول
روحِ اجمیری ؒ سرور پہ لاکھوں سلام
مستی حق سے سرشار سرتابہ پا
بوعلیؒ قلندر پہ لاکھوں سلام
آسمان تصوف کے مہر مبیں
الفؒ ثانی اطہر پہ لاکھوں سلام
شیخ محبوب الہیٰؒ فرشتہ صفت
فخر ناموسِ اکبر پہ لاکھوں سلام
کاکیؒ نیک خو مظہرؒ نیک دل
خسروؒ نیک محضر پہ لاکھوں سلام
تارک تاج وتخت اشرف الاولیاء
اشرف ؒ پاک وبرتر پہ لاکھوں سلام
صوفیائے کرام ؒ اولیائے عظامؒ
عاشقان پیمبرؐ پہ لاکھوں سلام
جملہ علمائے حق جملہ اقطاب دیں
جملہ صلحائے برتر پہ لاکھوں سلام
جوازل سے ہوئے ہوں گے جوحشر تک
ہر مسلماں برادر پہ لاکھوں سلام
آل واصحاب حضرت کا تو ذکر کیا
بلکہ ان کے سگِ درپہ لاکھوں سلام
برقؔ ہو میرے مرحوم والدپہؒ اور
میری مرحومہ ـؒ مادر پہ لاکھوں سلام
+++
|
