* عارض پہ تصدق ترے برگِ گل تر بھی *
نعت
عارض پہ تصدق ترے برگِ گل تر بھی
آب دُرِ دنداں سے خجل آبِ گہر بھی
اللہ غنی کیا ہے تری راہگزر بھی
جلتے ہیں جہاں حضرت جبریلؐ کے پر بھی
پاکر تری انگشتِ شہادت کا اشارا
دو ٹکڑے ہوا رعب جلالت سے قمر بھی
میں دور اسے قرب ہے مولا ترا حاصل
مجھ سے تو ہے بہتر کہیں تیرا سگِ در بھی
کیا کہیے ترے حسنِ خدا داد کا عالم
دیکھے رخِ پُر نور تو خیرہ ہو نظر بھی
شاید کہ یہ دونوں ہیں شہیدِ رخ وابرو
پُر خوں ہے شفق چاک ہے دامانِ سحر بھی
پوچھا جو زمانہ ہے یہ کیوں آپ کا بسمل
فرمایا نظر ہی تو ہے پھر جائے جدھر بھی
ہے برقؔ دل افگار بھی محتاج ترحم
ہاں ایک نظر اے شہِ کونین ادھر بھی
+++
|