نعت

اے رسول ہاشمیؐ وجہِ وجودِ کائنات
بیگماں بعدِ خدا ہے سب سے افضل تری ذات
مرکز دیں کہیے جن کو وہ ترے پائے ثبات
اور تفسیر ید اللہ سر بسر ہیں تیرے بات
لرزہ براندام کاخ شرک تیرے رو برو
سر بسجدہ تیرے آگے سطوت عزیٰ ولات 
نازش بزم ادب یعنی وہ شعرائے عرب
چیخ اٹھے یہ مردِ امی اور یہ اسرار ونکات
اک نظر میں جانے کیا کچھ کردیا تو نے عطا
اک اشارے ہی میں تو نے کھول دی راہ نجات
پھوٹ نکلے چشمہ ہائے فیض وحدت چار سو
علم کے دریا بہائے بے قلم کا غذ دوات
ہوگئے سینے ضیائے نورِ حق سے منجلی
دل کے آئینے میں دیکھا آدمی نے عکس ذات
تیرے شاگردوں نے تجھ سے رمز باطن سیکھ کر
علم کے انوار پھیلائے درونِ شش جہات
دیکھ کر تیرے غلاموں کے غلاموں کا جلال
قیصرہ کسریٰ کے رعب وتمکنت نے کھائی مات
علم وحکمت کا خزینہ ہے ترااک ایک قول
عقل ودانش کا مرقع ہے تری اک ایک بات
سوچتاہوں کچھ کہوں پھر سوچتا ہوں کیا کہوں
تیری مدحت میرا منہ میری زباں اور تیری بات
اپنی رحمت کے تصدق رحمت للعالمین
جانب برقؔ حزیں بھی ایک چشم التفات
+++