خوابیدہ آنکھوں والے اور جاگنے والے لوگ 

جانے کہاں گئے وہ کرنیں بانٹنے والے لوگ 


سڑکوں پر اب چیخ رہا ہے مہر بہ لب سناٹ 
ا 
اک اک کر کے رخصت ہو گئے بولنے والے لوگ 


دیکھ شکایت محفل میں ایسے تو نہیں کرتے ہیں 

دیکھ تو کیسے دیکھ رہے ہیں دیکھنے والے لوگ 


تھے کچھ لوگ جو بڑھ کر موت کو روک لیا کرتے تھے 

اب تو خود بھی مر جاتے ہیں روکنے والے لوگ 


وہ جو سخی ہیں بھر بھر جھولی اپنے گھر کو جائیں 

شام کو خالی لوٹ آتے ہیں مانگنے والے لوگ
*******