dil hai tire pyaar karne kuuñ 
jī hai tujh par nisār karne kuuñ 
ik lahr lutf kī hameñ bas hai 
ġham ke dariyā suuñ paar karne kuuñ 
chashm merī hai abr-e-nīsānī 
girya-e-zār-zār karne kuuñ 
chashm niiñ anjhuvāñ kī bastī kī 
zulm terā shumār karne kuuñ 
rashk siiñ jab koī chhue vo zulf 
dil uThe maar maar karne kuuñ 
is adā suuñ laTak laTak mat aa 
dil mirā be-qarār karne kuuñ 
naañv kuuñ garche tū mamūlā hai 
baaz hai dil shikār karne kuuñ 
kyā karūñ kis se jā lagā.ūñ ghaat 
'ābrū' us ke yaar karne kuuñ 

۸۸۸۸۸۸۸۸۸۸۸۸۸