nigah terī kā ik zaḳhmī na tanhā dil hamārā hai 
jagat saarā tirī in shoḳh do añkhiyoñ kā maarā hai 
hue haiñ āshiqāñ kī fauj meñ ham sāhib-e-naubat 
bajāyā aah ke Dañke setī dil kā naqārā hai 
hamārā dīn-o-maz.hab ai sajan terī itā.at hai 
ḳhudā kā kyuuñ na ho bandā ki jin tujh kuuñ sañvārā hai 
bujhā ai bevafā paanī suuñ apnī mehrbānī ke 
dahaktā dil manīñ mere tire ġham kā añgārā hai 
ḳhajil ho kar mirī añjhuvāñ kī jhaḌ señ abr paanī ho 
taḌapnā dekh kar dil kā hamārā barq haarā hai 
hameñ to raat din dil siiñ tumhārī yaad hai pyāre 
tuman neñ is qadar pyāre haman kuuñ kyuuñ bisārā hai 
nazar karnā karam siiñ 'ābrū' pe tum kuuñ lāzim hai 
kisī laa.eq nahīñ to kyā huā āḳhir tumhārā hai 

88888888888888888