سیدانورجاویدہاشمی

خامیاں دیکھ کے گفتار میں کردار میں تو  
مبتلا رہنے نہیں دے مجھے آزار میں تو   
خامہ و دست ِ قلم کار میں گُفتار میں تو
لفظ و معنیٰ سے مُرصع مرے افکار میں تو
دائرہ فکر و نظر کا ہو مُیسر مجھ کو 
صورتِ یاس نہ رہ چشمِ طلب گار میں تو
اوّل و آخرو ظاہر بھی تو الباطن بھی    
اپنے ہر وصف سے ظاہر نہیں دوچار میں تو      
منصبِ مدح کجا اور کجا میری زباں                 
ہر بُن ِ مو میں خدا،قلب کی رفتارمیں تو
حسرتیں دل میں جو تعبیر کیا چاہتا ہے                  
اُس تمنائی کی ہر خواہش ِ بے دار میں تو
کوئی سامع نہیں دُنیا میں مجھے تجھ سا ملے
بے خبر میں، رہے آئینہ ٔ  اخبار میں تو
واقعہ یہ ہے کوئی حمد نہیں لکھ سکتا 
جب تلک خود نہ پکارے اسے دربار میں تو
روشنائی کو عطا روشنی کرنے والے  
چاہے تو بجلیاں بھر دے مرے اشعار میں تو
دشت ِ بے آب میں اک عمر سے ترسی ہوئی ہیں 
رَم کریں آنکھیں انہیں رکھے جو گلزار میں تو
یہ برس جائیں تو دہقان کی چاندی ہوجائے
کتنی رکھتا ہے کشش ابرِ گُہر بار میں تو
سلسلہ ہائے نفس تیرے اشاروں پہ رہے
موج زن خون کو رکھے دل ِ بیمار میں تو
ڈوبتی نائو ہے ساحل کی تمنّا میں جہاں
دستِ ملّاح میں رکھے ہوئے پتوار میں تو
روزوشب نان و نمک مجھ کو فراہم کرکے
مجھ کو بکنے نہیں دیتا کسی بازار میں تو
میں کہ اک عمر خطا کار رہا میرے خدا
فیصلہ ترا رکھے نور میں یا نار میں تو
تیرا یہ کہنا ہے نزدیک رہے شہہ رگ سے  
چشمِ ظاہر کہے پوشیدہ ہر اسرار میں تو
لغزش ِ قلب و نظر پر بھی ہے اُمّید ِ کرم  
ہاشمیؔ  ناز کرے گا کہ ہے اظہار میں تو
؎؎؎؎؎