کیا عجب نکتہ نکالا ہاشمیؔ پیشِ سُخن
مصطفیؐ کے حرف گویا ہیں مقدّس پانچ تن
(م ص ط ف یٰ)
کیسے ممکن ہے ثنأ خوانی پھر اہلِ بیت کی
بندۂ مومن کے دل میں گر نہو اُن کی لگن
اہلِ حرف و مرثیہ خوانو بہ تقدیسِ قلم
تم کو ہی رکھنا ہے باقی انجمن در انجمن
آزمائش ہے کہ سر اللہ کے آگے جھکے
’تو جھکا گر غیر کے آگے تو تن تیرا نہ من ؎‘
السّلام آلِ نبیؑ  اے پاک طینت عاشقو
سرفروشی میں پہننے والو خونیں پیرَھن
ملّتِ اسلام کے اے جاں نثارو السّلام
گر قبول افتد زہے عزّو شرف رنگِ سُخن

سیدانورجاویدہاشمی،کراچی