جو سنگِ میلِ رہِ کوچہء وفا نہ ملا
’’کہاں کے دیر و حرم گھر کا راستہ نہ ملا‘‘
 
کہیں بھی مثل سراپائے یار کا نہ ملا
وہ ایک ایسے ملے ان سا دوسرا نہ ملا
 
جو ایک صورتِ رہبرنما نظر آئی
تلاشِ منزلِ مقصود کو ٹھکانہ ملا
 
حیات و موت میں یکسانیت نمایاں تھی
ملے جو ان سے تو جینے کا اک بہانہ ملا
 
ہم ان کے در پہ جو پنہچے وہیں پہ بیٹھ گئے
کہ اس کو چھوڑ کے جانے کا حوصلہ نہ ملا
 
کسی کا ساتھ ہی سرمایہء حیات رہا
کچھ اور اس سے سوا کیا‘ ملا ملا نہ ملا
 
خلوصِ نیت و وارفتگی جو چھوٹ گئی
خدا کو ڈھونڈتے پھرتے رہے خدا نہ ملا
 
پلٹ دئے سبھی صفحے کتابِ عرفاں کے
تمہارا نام بھی عارفؔ کہیں لکھا نہ ملا
 
سید وحید القادری عارفؔ
******************************