* محمد کو جو دل سے چاہتا ہے *
نعت پاک
محمد کو جو دل سے چاہتا ہے
بلندی پر اسی کا مرتبہ ہے
وہی بس رحمت للعالمیں ہیں
گنہگاروں کو ان کا آسرا ہے
ملی کفر و ضلالت سے رہائی
کرم انسانیت پر کر دیا ہے
رہے صبر و رضا میں اس کی ہردم
قناعت اس سے بڑھ کر اور کیا ہے
خدا کرتا ہے خود مدحت سرائی
فرشتوں میں تمہارا تذکرہ ہے
بلالو مجھ کو بھی اپنے قریں تم
یہی میری فقط اک التجا ہے
عمرؓ عثماںؓ ابو بکرؓ و علیؓ سے
بڑا مخصوص قربِ مصطفی ہے
کرم جس پر بھی فرمایا خدا نے
اسے دنیا میں سب کچھ مل گیا ہے
مقامِ شکر ہے اے یاس تم کو
شعورِ آگہی اس نے دیا ہے
٭٭٭
|