غزل

میری ہر بات کو اندازِ تکلم دیدے
اور افسردہ لبوں کو بھی تبسم دیدے

تشنگی ہونٹوں کی بجھتی ہی نہیں ہے ساقی
آج تو بہرِ کرم جام میں قلزم دیدے

میری غزلیں ابھی بے صوت وصدا لگتی ہیں
دل کشی کے لئے آواز و ترنم دیدے

میری دنیا میں اندھیرا ہے تجھے ہے معلوم
تو جو چاہے تو الہیٰ مہ وانجم دیدے

دیر تو تیرے یہاں ہے کوئی اندھیر نہیں
توُ جو چاہے تو تاخر کو تقدم دیدے

کوئی حرکت نہیں جنبش نہیں طاری ہے سکوت
بحرِ جذبات کی موجوں میں تلاطم دیدے

میری جانب سے کسی کو نہ کوئی دکھ پہنچے
نرم گوئی دے مجھے خوئے ترحم دیدے

گھر کا ماحول نظر آئے گلستاں کی طرح
قہقہہ پھولوں کو کلیوں کو تبسم دیدے

یاسؔ کے ظرف سے واقف ہے توُاے رب کریم
اس کی تقدیر کو ساغر ہو عطا خم دیدے
+++