غزل

ہم ریت پر حسین گھر وندے بنائیں کیا
رنگیں مچھلیوں کو سمندر میں لائیں کیا
بچے ضعیف لگنے لگے ہیں ہنسی بغیر
گھر کی صداقتیں تو ملیں، گھر کو جائیں کیا
خانہ بدوشیوں نے سہولت بھی چھین لی
کچھ بھی نہیں ہے پاس تو چولہا جلائیں کیا
دہر آشنا نگاہ میں مرقوم کیا نہیں
کیا چیز ساتھ لے کے چلیں، چھوڑ آئیں کیا
دیوار ودر پہ سبزہ بے گانہ اُگ گئے
ہم نیلے آسمان تلے سر چھپائیں کیا
بیدلؔ کو ہم پکاریں کہ راسخؔ کو ہم نشیں 
پٹنے کی بائولی میں لگائیں صدائیں کیا
تزئین کلیات کریں ہم شکیب ایاز
بازار نقد وجنس میں تاشے بجائیں کیا
٭٭٭