* بفضلِ خدا مسئلہ حل ہوا *
بفضلِ خدا مسئلہ حل ہوا
کہ دیوان میرا مکمل ہوا
جناب احمدِ مصطفیٰؐ کے طفیل
خدا سے بھی غافل نہ اک پَل ہوا
رہی فکرِ دیں بھی بہ فکرِ سخن
مرا دل ذرا بھی نہ بوجھل ہوا
نہ شوقِ عبادت میں آئی کمی
نہ ذوقِ سخن ہی معطل ہوا
جلا شعر گوئی میں جو خونِ دل
بچشمِ فصاحت وہ کاجل ہوا
نہ پھر بھی ادا مجھ سے حقِ سخن
بمثلِ سخن گوئے اکمل ہوا
مگر میں نے صابرؔ کہا جو بھی کچھ
جبینِ سخن پر وہ صندل ہوا
*********************** |