تجھ پہ قرباں جان و تن جب کہہ دیا تو کہہ دیا
اے وطن تجھ کو وطن جب کہہ دیا تو کہہ دیا

ہم چلیں گے دھوپ میں اب پائوں میں چھالے پڑیں
یا جھلس جائے بدن جب کہہ دیا تو کہہ دیا

اب اُسی کی کوکھ سے گلشن اُگانا ہے ہمیں
ہم نے صحرا کو چمن جب کہہ دیا تو کہہ دیا

اب اُسے ہم راہبر تسلیم کرسکتے نہیں
راہزن کو راہزن جب کہہ دیا تو کہہ دیا

ہم نے ظالم کو اگر ظالم کہا تو کیا ہوا؟
کیوں جبیں پر ہو شکن جب کہہ دیا تو کہہ دیا

جو بُرا ہے اُس کو اچھا کہہ کے ہم پچھتائیں کیوں
ہے یہ اپنا حسنِ ظن جب کہہ دیا تو کہہ دیا

شعر ناموزوں ہو صابرؔ یا کوئی پکڑے زباں
امن کو ہم نے امن جب کہہ دیا تو کہہ دیا
*********************************