پھول گلدان میں پھر نیا رکھ دیا
ایک مرجھا گیا دوسرا رکھ دیا

اک دیئے کو ہوا نے بجھا ڈالا جب
اک دیا پھر بدوشِ ہوا رکھ دیا

منہ چھپا کر گزرنے لگا ہر کوئی
میں نے جب راہ میں آئینہ رکھ دیا

بے نشاں ہوگئے منزلوں کے نشاں 
گمرہی نے جہاں نقشِ پا رکھ دیا

ننھے بچوں کے اخلاق و تہذیب نے
میرے ہونٹوں پہ حرفِ دعا رکھ دیا 

میری دیوانگی نے مرے ہاتھ سے
چھین کر کاسۂ مدعا رکھ دیا

مدّتوں جس سے صابرؔ وفا میں نے کی
نام اُس نے مرا بے وفا رکھ دیا
****************************