پھر ہم کو احتیاط سے چلنا بھی آگیا
ٹھوکر لگی ، گرے ، تو سنبھلنا بھی آگیا

سہمے ہوئے ہیں کچے مکانوں کے بام و دَر
اب گائوں کی ندی کو اُبلنا بھی آگیا

انگڑائی لی چمن میں جو فصلِ بہار نے 
سوکھے شجر کو پھولنا پھلنا بھی آگیا

ڈالا گیا جو تیل تو لَو تیز ہوگئی
بجھتے ہوئے چراغ کو جلنا بھی آگیا

گھر لوٹے ہم سفر سے کھلونے لئے ہوئے
بچوں کو اب خوشی سے اُچھلنا بھی آگیا

تھی مدتوں جو چھائی ہوئی مجھ پہ بے حسی
دیکھا تمہیں تو دل کو مچلنا بھی آگیا

صابرؔ مرے لئے تھے جو دشوار راستے
اُن راستوں پہ اب مجھے چلنا بھی آگیا
*****************************