حسن کو میرے وہ نکھرائے
رنگِ خوشی رُخ پر بکھرائے
جھلکے میرے روپ کا تیور
اے سکھی ساجن؟ نا سکھی زیور
ء
اُس کے بن بارات سجے نا
شادی میں شہنائی بجے نا
اُس میں چنچل پن ہے تھوڑا
اے سکھی ساجن ؟ نا سکھی گھوڑا
ء
پہنے ہوئے کرنوں کی مالا
جب وہ آئے کردے اجالا
صبح کو دیکھوں اُس کی سج دھج
اے سکھی ساجن؟ نا سکھی سورج
ء
گھر گرہستی سے جب چھوٹوں
خوب مزے میں اُس کے لوٹوں
پہنچائے وہ مجھ کو راحت
اے سکھی ساجن؟ نا سکھی فرصت
***