تھام لے جب وہ میرا دامن
بڑھ جائے کچھ میری الجھن
رنگت اُس کی مثلِ زاغ
اے سکھی ساجن؟ نا سکھی داغ
ء
ہردم اچھل کود اُس کی عادت
چنچل پن ہے اُس کی فطرت
چین سے بیٹھے وہ نا پل بھر
اے سکھی ساجن؟ نا سکھی بندر
ء
اُس نے میرا روپ نکھارا
کیوں نہ لگے وہ مجھ کو پیارا
سکھلائے سج دھج کے رہنا
اے سکھی ساجن؟ نا سکھی گہنا
ء
بُرا بھلا وہ مجھ کو سنائے
دو دو آنسو کبھی رُلائے
اپنے غصے کو دے بانٹ
اے سکھی ساجن؟ نا سکھی ڈانٹ
***