* جب وہ بھیانک روپ دکھائے *
جب وہ بھیانک روپ دکھائے
نیند میں آکر مجھ کو ڈرائے
جاگوں تو کردے بیتاب
اے سکھی ساجن؟ نا سکھی خواب
ء
صاف و شفاف اُس کا سینہ
رکھے نا وہ بغض و کینہ
اُس کے لب سے پھوٹے ترنم
اے سکھی ساجن؟ نا سکھی قلزم
ء
کوئی کمانا اُس سے سیکھے
خوب کمائے بن پونجی کے
ہوتا نہیں کام اُس کا مندہ
اے سکھی ساجن؟ نا سکھی چندہ
ء
حرفوں کو آپس میں ملاکر
لفظوں کی تصویر بناکر
قاری کو کرتا ہے مخاطب
اے سکھی ساجن؟ نا سکھی کاتب
*** |