* دل و نظر کو مرے چاہے جو شکار کرے *
دل و نظر کو مرے چاہے جو شکار کرے
نگاہِ یار کرے فکر روزگار کرے
زمانہ کیسے بھلا اس کا اعتبار کرے
جو اپنے قول کی تردید باربار کرے
چھڑاسکے گا نہ دامن کبھی محبت سے
خیالِ ترکِ محبت کوئی ہزار کرے
غلط جو کام ہے اس کو غلط کہیں گے ہم
وہ بے وقوف کرے یا کہ ہوشیار کرے
ہر آدمی کے روئیے پہ منحصر ہے یہ بات
کرے کسی سے وہ نفرت کسی سے پیار کرے
صحیح اُس کو جہاں والے کہہ نہیں سکتے
غلط روش کوئی انساں جو اختیار کرے
تمہیں اگر نہ سنو صابرِؔ حزیں کا حال
تو اور کس سے وہ اظہارِ حالِ زار کرے
***************** |