* صحنِ گلشن کی رعنائیاں لے گئیں *
صحنِ گلشن کی رعنائیاں لے گئیں
رونقِ گلستاں آندھیاں لے گئیں
اُس طرف بھی ملے منزلوں کے نشاں
جس طرف مجھ کو گمراہیاں لے گئیں
وہ نہ جاتا کبھی گائوں کو چھوڑکر
شہر میں اس کو مجبوریاں لے گئیں
تیری یادوں کا ساون برستا رہا
نیند آنکھوں سے پروائیاں لے گئیں
نیک نامی کے حصے میں آئیں کہاں
شہرتیں ساری بدنامیاں لے گئیں
جن کی قربت پہ صابرؔ مجھے ناز تھا
دور مجھ سے انہیں دوریاں لے گئیں
********************* |