رنگِ تہذیب و ادب سے جو تھی عاری تصویر
بن گئی اہلِ نظر میں وہی پیاری تصویر

سیکڑوں کھینچیں لکیریں تو کبھی کچھ نہ بنا
چند نقطوں سے کبھی بن گئی پیاری تصویر

کیوں نہ ہو اُس کے رگ و پے میں اُداسی کی جھلک
ہے مصوّر کے غم و یاس کی ماری تصویر

دیکھتے دیکھتے پڑجاتے ہیں سکّوں کے داغ
راستے پر جو بناتا ہے بھکاری تصویر

بار بار اُس کی طرف دیکھ رہے تھے سب لوگ
تھی نمائش میں برہنہ بڑی پیاری تصویر

اُس پہ لوگوں نے اُچھالی تھی ہوس کی کیچڑ
کیوں نہ میلی نظر آتی وہ کنواری تصویر

ہم نے لفظوں میں بھرے رنگِ تخیل صابرؔ
ڈھل گئی شعر کے پیکر میں ہماری تصویر
***