سمٹ کے رہ گئی اہلِ جہاں کے حصّے میں
زمین کچھ نہ بچی آسماں کے حصّے میں

ذرا سی بات اٹھی کیا کہ ُاٹھ گئی دیوار
ہوا اضافہ ہمارے مکاں کے حصّے میں

تمام اشک سرِ شام مت بہا دینا
طویل رات ہے آہ و فغاں کے حصّے میں

گئی بہار تو گلشن پہ پھرگئی جھاڑو
بچا نہ ایک بھی تنکا خزاں کے حصّے میں

ہوا جو ختم دمِ صبح رت جگے کا سماں
تو صرف نیند بچی تھی اذاں کے حصّے میں

جواب اس کا مرے ممتحن کے پاس نہ تھا
سوال تھا جو مرے امتحاں کے حصّے میں

***********************