ابھی تو روشنی ہے دن تمام ہونے دیجئے
چراغِ شام جل اٹھیں گے شام ہونے دیجئے

زبان ہی پہ گفتگو کا سارا بوجھ کیوں رہے
کبھی تو خامشی کو ہم کلام ہونے دیجئے

میں چاہتا ہوں پہلے نظمِ میکدہ درست ہو
وہ چاہتے ہیں پہلے دَورِ جام ہونے دیجئے

پھر اُس کے بعد کیجئے گا امن کا مظاہرہ
ابھی کچھ اور روز قتلِ عام ہونے دیجئے

ہماری داستان خود بیاں کر یں گی منزلیں
ہمارے کارواں کو تیز گام ہونے دیجئے

سنائیں گے پھر اُس کے بعد بے خودی کی داستاں
فسانۂ خودی کا اختتام ہونے دیجئے

خرابی اور خوبی اُس کی دیکھئے گا بعد میں
جو کررہے ہیں صابر ؔآپ کام ہونے دیجئے
****