یوں تو ہونے کو ہوئے منصفِ دوراں کتنے
بے گناہوں سے بھرے پھر بھی ہیں زنداں کتنے

سیدھی سادی سی کہانی تھی دلِ انساں کی
گردشِ وقت نے بخشے اِسے عنواں کتنے

بے لباسی ہی پہ موقوف نہیں عریانی
جسم رہتے ہیں لباسوں میں بھی عریاں کتنے

کیوں اندھیرے ہی پہ الزام ہو گمراہی کا
روشنی میں بھی بھٹک جاتے ہیں انساں کتنے

آج آئینے میں کچھ اور ہے صورت اپنی
کل تھے ہم اپنے خد و خال پہ نازاں کتنے

روشنی دے نہ سکے ذہن کو اپنے صابرؔ
دیر و کعبہ میں کئے ہم نے چراغاں کتنے
****