پیشِ آئینۂ ہستی رخِ زیبا لائو
چہرگی ناز کرے جس پہ وہ چہرہ لائو

لوریاں دیکے سلانے کا زمانہ یہ نہیں
کردے بیدار جو ذہنوں کو وہ نغمہ لائو

بھول بیٹھے ہیں نئے قافلے منزل کے نشاں
پھر وہی راہ ، وہی نقشِ کفِ پا لائو

سوکھ جائے گا یہ چھوٹا سا کنواں پل بھر میں
بھیڑ پیاسوں کی لگی ہے کوئی دریا لائو

سیر وتفریح کے سامان بدل ڈالو اب
جس کا مقصد ہو تحفّظ وہ تماشا لائو

مجھ سے بہتر تو بہت سارے ملیں گے صابرؔ
لا سکو تم تو کوئی ڈھونڈ کے مجھ سا لائو
*****************