سرخیٔ لالہ و گل صحنِ چمن کی زینت
سرفروشوں کا لہو دار و رسن کی زینت

رونقِ شامِ وطن تیری صدائے ناقوس
میری آوازِ اذاں صبح وطن کی زینت

شہر یاروں کی جبنیوں پہ ہے وہ بات کہاں
ہے جو پیشانیٔ محنت پہ شکن کی زینت

جسم پوشی کے لئے کون پہنتا ہے لباس
آجکل جامۂ عریاں ہے بدن کی زینت

کردیا مسخ اُسے فرقہ پرستوں نے آج
تھی جو تہذیبِ وطن گنگ وجمن کی زینت

چاہنے والے نہ ہوں فن کے تو بیکار ہے فن
قدر دانوں سے ہے فنکار کے فن کی زینت

خون دل میں نے پلایا ہے اسے اے صابرؔ
کیوں نہ ہو میری غزل بزمِ سخن کی زینت
****************